പമ്പ: ഈ വർഷത്തെ ശബരിമല നിറപുത്തരി പൂജ പ്രമാണിച്ച് കൂടുതൽ സർവീസുകൾ ക്രമീകരിച്ച് കെഎസ്ആർടിസി. മുൻവർഷങ്ങളിലേതിനുസമാനമായി വിപുലമായ ഒരുക്കങ്ങളാണ് കെഎസ്ആർടിസി നടത്തുന്നത്. നിറപുത്തരി പൂജയോടനുബന്ധിച്ച് ഓഗസ്റ്റ് 9 നു വൈകീട്ട് അഞ്ച് മണിക്കാണ് ശബരിമല നടതുറക്കുക. വ്യാഴാഴ്ച രാത്രി 10:00 മണിക്ക് നട അടയ്ക്കും. തീർഥാടകർക്ക് ശബരിമലയിലേക്ക് എത്തുന്നതിനുള്ള യാത്രാ സൗകര്യമൊരുക്കുന്ന നടപടി പൂർത്തിയായെന്ന് കെഎസ്ആർടിസി അറിയിച്ചു. തിരുവനന്തപുരം, പത്തനംത്തിട്ട, കൊട്ടാരക്കര, പുനലൂർ, ചെങ്ങന്നൂർ എന്നിവിടങ്ങളിൽ നിന്ന് പമ്പയിലേയ്ക്ക് തീർഥാടകരുടെ തിരക്കനുസരിച്ച് സർവീസുകൾ ക്രമീകരിച്ചിട്ടുണ്ട്. അയ്യപ്പഭക്തരുടെ സൗകര്യാർഥം പമ്പയിലേക്ക് ഒരാഴ്ച മുൻപ് സീറ്റ് ബുക്ക് ചെയ്യാനുള്ള സൗകര്യങ്ങളും ലഭ്യമാക്കിയിട്ടുണ്ട്. നിലയ്ക്കൽ – പമ്പ ചെയിൻ സർവീസുകൾ ഇടതടവില്ലാതെ ക്രമീകരിച്ചിട്ടുണ്ടെന്നും കെഎസ്ആർടിസി അറിയിച്ചു.
തിരുവനന്തപുരം സെൻട്രൽ ഡിപ്പോയിൽ നിന്ന് യാത്രക്കാരുടെ തിരക്കനുസരിച്ച് സ്പെഷ്യൽ ബസുകളും, മുൻകൂട്ടി ബുക്കിങ്ങ് സൗകര്യവും ഇതിനോടകം ഏർപ്പെടുത്തിയിട്ടുണ്ട്. കൂടുതൽ തിരക്കനുഭവപ്പെടുന്ന സാഹചര്യത്തിൽ തൊട്ടടുത്ത യൂണിറ്റുകളിൽ നിന്നും സർവീസുകൾ ക്രമീകരിക്കുന്നതിനുള്ള സംവിധാനവും ഒരുക്കിയിട്ടുണ്ട്.യാത്രയുമായി ബന്ധപ്പെട്ട കൂടുതൽ വിവരങ്ങൾക്ക് കെഎസ്ആർടിസി പമ്പ ഫോൺ: 0473-5203445, തിരുവനന്തപുരം ഫോൺ: 0471-2323979, കൊട്ടാരക്കര ഫോൺ: 0474-2452812, പത്തനംത്തിട്ട ഫോൺ: 0468-2222366 എന്നീ നമ്പറുകളിൽ ബന്ധപ്പെടാം.
മരിയൻ തീർഥാടന കേന്ദ്രമായ വ്ലാത്താങ്കര സ്വർഗ്ഗാരോപിത മാതാ ഫെറോന ദൈവാലയത്തിലെ തീർഥാടനത്തോടനുബന്ധിച്ചും കെഎസ്ആർടിസി പ്രത്യേകസർവീസുകൾ ഒരുക്കിയിട്ടുണ്ട്. ആത്മീയ നവീകരണ ധ്യാനം തുടങ്ങുന്ന ഓഗസ്റ്റ് 6 മുതൽ 13 വരെ ഉള്ള ദിവസങ്ങളിൽ വൈകുന്നേരം അഞ്ചുമണി മുതൽ കെഎസ്ആർടിസി നെയ്യാറ്റിൻകര പാറശ്ശാല, വെള്ളറട ,കാട്ടാക്കട ,വിഴിഞ്ഞം യൂണിറ്റുകളിൽ നിന്നും തീർഥാടന നഗരിയിലേക്കും രാത്രി 9 മണിക്ക് തിരിച്ച് വിവിധ പ്രദേശങ്ങളിലേക്കും സ്പെഷ്യൽ സർവീസുകളാണ് ഒരുക്കിയിരിക്കുന്നത്.